Tími til kominn að breyta þessu kerfi

Annað hvort laug stjórnarformaður LIVE þegar hann fullyrti í fréttum að sjóðurinn hefði tapað á fjárfestingum í Icelandair, eða hann vissi ekki betur. Það er spurning hvort er verra - þetta er formaður stjórnar stærsta lífeyrissjóðs landsins.

Það er auðvitað vonlaust kerfi að lífeyrissjóðum landsmanna sé stjórnað af einhverjum hagsmunaaðilum sem beita þeim í pólitískum hráskinnaleik. Annað hvort eiga lífeyrissjóðir að vera undir beinni stjórn sjóðfélaga, eða það á einfaldlega að leggja þá niður og láta ríkið sjá um að ávaxta lífeyrinn.

SÍ skoðar lífeyrissjóði vegna útboðs Icelandair

Athugasemdir

[Kolbrún Hilmars, 23.9.2020 kl. 12:35]

Eitthvað þarf að gera með þessa lífeyrissjóði - þeir eru orðnir of stórir.  Sjóðfélagar kvarta yfir áhættufjárfestingum, sem er þó innbyggt í kerfi sjóðanna.
Gæti Seðlabankinn gert betur?  Hæpið að ríkið sjálft sjái um sjóðina, af ýmsum ástæðum.

[Þorsteinn Siglaugsson, 23.9.2020 kl. 13:23]

Já, það getur verið hæpið að ríkið sjái um sjóðina, en það er kannski illskárra en að pólitískir pótintátar geri það. Best væri væntanlega að lækka framlög í lífeyrissjóði svo fólk geti fjárfest meira sjálft.

[Kolbrún Hilmars, 23.9.2020 kl. 13:54]

Ég er sammála því að lækka framlögin, 15,5% af launum er fullmikið af því góða. Útborguð laun meðalmannsins duga nú orðið aðeins fyrir nauðþurftum og lítið aflögu til fjárfestinga eða sparnaðar.

[Guðmundur Ásgeirsson, 23.9.2020 kl. 14:20]

Annað hvort laug varaformaður stjórnar LIVE þegar hún hélt því fram opinberlega að það hefði þjónað hagsmunum sjóðfélaga að fjárfesta meira í Icelandair, eða hún vissi ekki betur. Það er spurning hvort er verra - þetta er varaformaður stjórnar stærsta lífeyrissjóðs landsins og formaður Landssamtaka lífeyrissjóða.

Það er auðvitað vonlaust kerfi að lífeyrissjóðum landsmanna sé stjórnað af einhverjum hagsmunaaðilum sem beita þeim í pólitískum hráskinnaleik. Annað hvort eiga lífeyrissjóðir að vera undir beinni stjórn sjóðfélaga, eða það á einfaldlega að leggja þá niður og láta ríkið sjá um að ávaxta lífeyrinn.

[Kolbrún Hilmars, 23.9.2020 kl. 15:06]

Guðmundur, lífeyrissjóðum í núverandi formi og eins stórir og þeir eru orðnir, verður alltaf stjórnað af hagsmunaaðilum - hvaðan sem þeir koma. Við erum jú að tala um rúmlega 5000 milljarða íslenskra króna!

[Guðmundur Ásgeirsson, 23.9.2020 kl. 16:05]

Kolbrún. Það er ekki náttúrulögmál að svo sé. Sem dæmi því til sönnunar er til a.m.k. einn lífeyrissjóður þar sem stjórn er kjörin af sjóðfélögum. Þeim er það í sjálfsvald sett.

[Þorsteinn Siglaugsson, 23.9.2020 kl. 18:51]

Hvers vegna segir þú þetta Guðmundur? Hefur þú einhverjar upplýsingar um að það hefði verið óskynsamlegt fyrir sjóðinn að taka þátt í útboðinu?

Stjórnarformaðurinn lýsti því yfir að sjóðurinn væri búinn að tapa á fjárfestingum sínum í félaginu. Það er ósatt. Hvort sem hann vissi ekki hver hagnaður sjóðsins af þessum fjárfestingum hefur verið, eða hvort hann sagði vísvitandi ósatt er það mikið áhyggjuefni fyrir sjóðfélaga.