Ekki fleiri opin bréf, takk

Ég vonast til þess að þessum opnu bréfasendingum taki að linna. Þjóðkirkjan og Siðmennt ættu að sjá sóma sinn í því að boða frekar til ráðstefnu um þessi mál þar sem þau yrðu rædd á breiðum grundvelli og af skynsamlegu viti. 

Siðmennt svarar biskup

Athugasemdir

[Þór Sigurðsson, 10.12.2007 kl. 00:47]

Það þarf enga ráðstefnu til. Tilmæli mannréttindadómstóls SÞ, stjórnarskrá Íslands og heilbrigð skynsemi eiga að vera nógu góð leiðarljós fyrir stjórnendur landsins til að tryggja skýr skil á milli ríkis og kirkju. Þar til teljast þær menntaleiðir sem standa grunnskólanemum til boða. Grunnskólar eru hluti af ríkinu. Kirkjan kostar þar engu til, nema ef vera skyldi sínum eigin áróðri, sem á engan stað í hugum ómótaðra einstaklinga.

Trúarbragðafræðsla á hinsvegar allan rétt á sér. Þá og sér í lagi hverju trúarbrögð hafa áorkað síðustu tvö árþúsundin. Hvaða mannfall hefur orðið af völdum trúarbragða, hvað mannskepnan hefur hagnýtt sér trúgirni til að hafa áhrif á fólk, og, að þetta skuli allt viðgangast enn þann dag í dag. Það væri fræðsla sem kæmi að gagni.

[Svanur Sigurbjörnsson, 10.12.2007 kl. 01:08]

Sæll Þorsteinn

Hvar er "hið skynsamlega vit"?  Er umræða á ráðstefnu eitthvað æðri eða betri umræðu í gegnum bréfaskipti?  Ég tel að fullorðið fólk með góða grunnmenntun ætti að geta skipst á skoðunum bréflega án þess að nota gífuryrði.  Siðmennt hefur beðið að farið sé eftir samþykkt Mannréttindasáttmála SÞ sem á nú 60 ára afmæli í dag, en biskup bregst hart við og kallar félagið "hatrömm samtök".  Hvar er skilningur biskups á mannréttindum?  Sérðu fyrir þér ráðstefnu með manni sem tekur svona til máls gagnvart mótaðila sem er að fara fram á sjálfsögð mannréttindi? 

Í fréttatíma Stöðvar 2 var sýnt frá síðasta kirkjuþingi (í október minnir mig) og þar gat að líta konu sem í ræðupúlti talaði máli samkynhneigðra en fékk allt í einu háværar aðhrópanir frá ákveðnum presti á þinginu.  Sr. Bjarni Karlson þurfti að halda utan um konuma grátandi á leið frá púltu.  Manni hrís hugur ef maður þyrfti að taka þátt í slíkri ráðstefnu.

[Þorsteinn Siglaugsson, 10.12.2007 kl. 08:47]

Það er hárrétt að ef maður er svo sannfærður um eigin afstöðu að manni finnst ekki taka því að rökræða hana, þá þarf enga rökræðu. Eða hvað? Er það ekki einmitt vísbending um að þörf sé á rökræðu? Og varðandi bréfaskiptin, þá hafa þau greinilega ekki dugað til að ná sáttum, enda er eðli opinna bréfa einfaldlega þannig, að þau henta betur til að koma sjónarmiðum á framfæri en til að rökræða þau.

Ef aðilar hafa hins vegar engan áhuga á að skilja sjónarmið hvor annars þá geta þeir mín vegna haldið áfram að dæla út opnum bréfum þangað til enginn nennir að lesa þau lengur!

[Jakob Ágúst Hjálmarsson, 10.12.2007 kl. 14:31]

Ég veit ekki hvort Siðmennt og Þjóðkirkjan ættu að teljast ein aðilar þessa máls. Meiru skiptir hvað almenningi þykir um þetta og skólunum sjálfum. Það er ekki eins og hér sé neitt annað að byrja heldur en athugasemdir Siðmenntar sem ganga út frá því að heimurinn hafi orðið til áðan. Ég hef fjallað svolítið um þetta á http://jagust.blog.is og vil umfram allt skynsamlega umræðu í menningarlegu samhengi. 

[Þorsteinn Siglaugsson, 10.12.2007 kl. 15:21]

Takk fyrir góða ábendingu, Jakob. Menningarlega og sögulega samhengið er mikilvægur þáttur þessa máls og vafalaust færi vel á því að fulltrúar almennings og skóla kæmu í auknum mæli að þessari umræðu. Eins gæti einföld og hlutlæg fræðsla um kirkjuna, hlutverk hennar og sögu hjálpað til við að eyða ýmiss konar misskilningi sem mig grunar því miður að oft liggi að baki málflutningi þeirra sem hæst hafa í þessari umræðu.