"Vinur ...

... er sá er til vamms segir" segir orðtakið. Það er þó ekki þar með sagt að vinir þurfi að sjá skrattann í hverju horni, eins og þessir ágætu hollvinir útvarpsins.

Mér finnst það ákaflega langsótt að draga þá ályktun að stuðningur Björgólfs við sjónvarpið sé einhvers konar skref í einkavæðingu stofnunarinnar, hverjar svo sem persónulegar skoðanir hans á ríkisrekstri fjölmiðla eru. Hvers vegna er ekki hægt að líta þessa höfðinglegu gjöf réttum augum? Væri ekki nær að hollvinasamtökin fögnuðu framtaki Björgólfs en vöruðu jafnframt við því að það yrði til þess að ríkið drægi á móti úr framlögum til dagskrárgerðar. Það væri meira vináttubragð, held ég.

Hollvinir RÚV mótmæla samningi við Björgólf Guðmundsson

Athugasemdir

[Hlynur Hallsson, 12.11.2007 kl. 12:14]

Það er því miður ekki langsótt Þorsteinn. Og Björgúlfur hefur með "stuðningi" sínum nú þegar náð tökum á rúv. Talandi um tök Björgúlfs þá er hann (Landsbankinn) styrktaraðili Myndstefsverðlaunanna, verðlauna til myndhöfunda, og viti menn: HANN SITUR Í DÓMNEFNDINNI! Ég velti fyrir mér áhrifum hans þar... Bestu kveðjur,

[Hlynur Hallsson, 12.11.2007 kl. 12:15]

Bendi á einnig á þessa frétt af vísi.is. Bk,

[Þorsteinn Siglaugsson, 12.11.2007 kl. 13:12]

Hefur styrkur BG vegna Myndstefs eitthvað með styrkinn við RÚV að gera?

Varðandi fréttina á Vísi, þá eru það nýjar fréttir að þessi þáttagerðarstyrkur tengist fréttastofunni eitthvað.

Menn mega ekki fara á taugum. Ekkert sem bendir til annars en að kallinn sé bara að reyna að láta gott af sér leiða!

[Hlynur Hallsson, 12.11.2007 kl. 14:00]

Allir góðmennskustyrkir hafa eitthvað með hvern annan að gera og þeir hafa einnig eitthvað með áhrif að gera. Annars er ég sallarólegur, sennilega of rólegur yfir þessu. Bestu kveðjur,

[Þorsteinn Siglaugsson, 12.11.2007 kl. 15:32]

Þarna kemur þú einmitt að kjarna málsins, Hlynur. Ég veit að samkvæmt marxískri söguskoðun eru alltaf hagræn mótíf á bak við allt sem gert er. (Sama á reyndar við um nálgun öfgafrjálshyggjumanna, sbr. public choice kenningarnar.) Mér finnst hins vegar óvarlegt að taka slíkar niðurstöður sem gefnar, ekki síst vegna þess að það er lífsins ómögulegt að hugsa sér leið til að afsanna hvorki marxisma né öfgafrjálshyggju!

Bestu kveðjur, Þorsteinn