Lausaganga húsflugna á Akureyri

Nýverið var flutt á RÚV löng frétt um að kisi nokkur hefði farið inn um opinn glugga hjá frú einni á Akureyri og gert stykki sín í stofusófann. Frúin var að sjálfsögðu svekkt yfir þessu og sá það helst til ráða að banna köttum á Akureyri að vera úti. Það þótti henni væntanlega einfaldara en að passa að hafa gluggana lokaða þegar hún færi í frí.

Í gær var svo bætt um betur og rakið í ennþá lengri frétt að húsflugur öngruðu nú Akureyringa sem aldrei fyrr. Jafnvel meira en utanbæjarmennirnir, en þeir munu orsök þess að ákveðið hefur verið að leggja niður dýflissuna á Akureyri, enda afbrot öll á ábyrgð hinna aðkomnu og þægilegra fyrir alla að þeir séu sem næst heimahögunum. Og nú hefur víst bæst við undirskriftasöfnun þar sem krafist er banns við lausagöngu húsflugna á Akureyri.

Utanbæjarmenn, kisur og húsflugur. Hvað verður næsta frétt um? Maður bíður spenntur.

Athugasemdir

[Sigfus (IP-tala skráð) 30.7.2020 kl. 00:22]

Þessi frétt ætti fá smá skammt af athygli en þá man ég , þér ekki vel við flugliða. Engu að síður athyglisvert ef rétt er. https://www.ruv.is/frett/2020/07/29/spyrja-sig-hvort-icelandair-hafi-hegnt-flugfreyjum

[Magnús Sigurðsson, 30.7.2020 kl. 06:35]

Einn félagi minn vill helst banna lausagöngu Akureyringa.

Annars er það merkilegt hvað fólk telur sig hafa mikinn rétt umfram allar aðrar lifandi verur á þessari jörð, sumir reikna t.d. fastlega með því að dýr og fuglar kunni umferðareglurnar.

Svo ekki sé nú talað um þá flækjast um á hreindýra hryggja og gæsabringuveiðum, þá er jafnvel utanvega akstur góðkenndur.

[Sigurður I B Guðmundsson, 30.7.2020 kl. 11:47]

Hreinlætið er svo mikið á Akureyri að fuglarnir sem fljúga þar yfir fljúga á bakinu!!

[Þorsteinn Siglaugsson, 31.7.2020 kl. 09:23]

Kannski þeir haldi líka fyrir nefið með öðrum vængnum til að forðast klórlyktina Sigurður?

[Þorsteinn Siglaugsson, 31.7.2020 kl. 09:25]

Lausaganga flugfreyja er auðvitað harðbönnuð Sigfús, enda tókst á endanum að reka þær heim í rétta stéttarfélagið.

[Þorsteinn Siglaugsson, 31.7.2020 kl. 09:26]

Þessi félagi þinn hlýtur að vera utanbæjarmaður Magnús.