Hani á haug

Maður veltir nú fyrir sér hvort það sé nokkuð sniðugt að láta svona æstan kall stjórna kvennastétt eins og hjúkrunarkonur eru nú óneitanlega. Svona karlar verða kannski eins og hanar í hænsnabúi og þurfa stöðugt að vera að sýna sig fyrir hænunum. Ætli það sé kannski ástæðan fyrir að illa gengur að semja að haninn er mest í því að standa á haugnum á annarri löppinni og gala til að ganga í augun á hænununum, fæla burt aðra hana og óneitanlega, en þó ekki af ráðnum hug, að pirra þá sem hlýða þurfa á sönginn?

(Svo má nú alveg spyrja sig hversu langt við erum í rauninni komin í jafnréttismálum í ljósi þess að það virðist ótrúlega oft þannig að um leið og einn kall er kominn inn í kvennastétt verði hann nánast sjálfkrafa formaður í félaginu. Þetta er ekki eina dæmið.)

„Vona að mitt fólk standi í lappirnar“

Athugasemdir

[ls (IP-tala skráð) 12.6.2015 kl. 11:07]

Hingað til hefur það nú verið þannig að vilji menn lækka laun í einhverri stétt, þá þarf bara að gera hana að 'kvennastétt'. Kennarar eru ágætt dæmi um það. Því miður virðist það svo að störf sem konur sækja frekar í en karlar séu minna metin en önnur og ver borguð.

Það gæti þess vegna verið tilraunarinnar virði að setja karlinn í formennskuna - kannski nær hann betri árangri bara af því að hann er karl!

Það er svo náttúrlega félagsmannanna sjálfra að kveða úr um hvort tiltekinn formaður sé að standa sig eða ekki; skoðanir okkar sem stöndum fyrir utan skipta engu máli (þó við megum að sjálfsögðu hafa hvaða skoðun sem við viljum - eða enga).

[Þorsteinn Siglaugsson, 12.6.2015 kl. 11:23]

Hver gerði kennara að kvennastétt? Voru það "þeir"?

Ja, ég er nú hræddur um að í þessu tilfelli sé tæpast hægt að tala um árangur, svo ekki styður það hugmyndina um yfirburði karlmanna í þessu efni.

[Gísli Sigurðsson, 12.6.2015 kl. 11:36]

Það gerði enginn kennarastéttina að kvennastétt, hún varð það bara. Það er staðreynd að þau störf sem konur fjölmenna í lækka í launum að tiltölu, á löngum tíma að sjálfsögðu, þá tekur fólk illa eftir því.

[Steinar (IP-tala skráð) 12.6.2015 kl. 11:56]

Hvers vegna segiru að hann sé æstur?

Mér hefur sýnst hann vera einstaklega rólegur og yfirvegaður í öllum viðtölum sem hann hefur farið í.

[Þorsteinn Siglaugsson, 12.6.2015 kl. 12:17]

Það er nú að hitna í kolunum hjá honum ;)

[ls (IP-tala skráð) 12.6.2015 kl. 12:54]

 Þó að megi kannski skilja orð mín svo að kennarastéttin hafi verið gerð að kvennastétt var það ekki ætlunin, kennarastéttin var nefnd sem dæmi um stétt sem lækkaði í launum samfara því að konur urðu fjölmennari í stéttinni.

Hvort það virkar betur að setja kall í brúnna veit ég náttúrlega ekkert um. Leikritið er enn í fullum gangi og engin niðurstaða komin.

[Þorsteinn Siglaugsson, 12.6.2015 kl. 14:12]

Kannski líka spurning hvort kemur á undan eggið eða hænan. Varð kennarastéttin kvennastétt vegna þess að launin lækkuðu eða lækkuðu launin vegna þess að konum fjölgaði í stéttinni. Ég veit það ekki en það væri gaman að komast að því.