Ekki alveg einfalt mál

Vart er hægt að segja að staðan sé skýrari eftir að utanríkisráðherra afhenti bréfið fræga í síðustu viku. Á sínum tíma var samþykkt þingsályktun um að sótt skyldi um aðild að sambandinu. Á það hefur verið bent að þingsályktunin sjálf lifi ekki endalaust. Það er hárrétt. En það skiptir ekki neinu máli því það sem ályktað var um var framkvæmt: Sótt var um aðild. Allt rifrildi um gildi þessarar þingsályktunar er því markleysa ein. Hún skiptir engu máli lengur sem slík. 

Viðræðurnar voru síðar settar í bið. En þar með er ekki sagt að þeim hafi verið slitið. Og það virðist ekki heldur hafa gerst með bréfinu góða. Því er erfitt að sjá annað en Ísland sé enn umsóknarríki. Og hverju er þá verið að mótmæla? Er ekki miklu heppilegra fyrir aðildarsinna að bíða átekta, vonast til að ná meirihluta í næstu kosningum og geta þá tekið til við að ljúka málinu. Þá væri auðvitað skynsamlegast að byrja á þjóðaratkvæðagreiðslunni sem frambjóðendur núverandi stjórnarflokka lofuðu í aðdraganda síðustu kosninga.

Boðað til mótmæla á Austurvelli

Athugasemdir

[Guðmundur Ásgeirsson, 15.3.2015 kl. 13:12]

Jú þeim var víst slitið, af ESB.

Þess vegna ættu þeir sem vilja mótmæla því að gera það fyrir framan sendiráð ESB í Aðalstræti 6 frekar en á Austurvelli.

Það er fátt kjánalegra en að boða til mótmæla á röngum stað.

*aulahrollur*

[Þorsteinn Siglaugsson, 15.3.2015 kl. 14:17]

Slitið af ESB? En þá segði ESB tæpast að Ísland sé enn umsóknarríki. Þett getur því ekki staðist hjá þér held ég.

[Guðmundur Ásgeirsson, 15.3.2015 kl. 16:18]

ESB sleit viðræðunum.

Taktu eftir: viðræðunum, ekki umsókninni.

Umsókn er eitt, viðræður um hana eru annað.

Staðfesting á móttöku viðræðuslita, eru ekki viðræðuslit.

Utanríkisráðherra gerði ekki annað en staðfesta móttöku.

Hann dró hinsvegar enga umsókn um neitt til baka.

Þeirri umsókn er sjálfhætt í ljósi stöðunnar.

[Þorsteinn Siglaugsson, 15.3.2015 kl. 17:04]

Já, ég er ekki alveg viss um að það sé endilega nóg að endurtaka það bara að ESB hafi slitið viðræðunum. Ég veit ekki betur en að fyrri ríkisstjórn hafi sett þær í bið. ESB gerði ekkert til að slíta þeim held ég.