Nýja arðsemismatið keisarans!

Ég held að meðfylgjandi graf úr skýrslu Landsvirkjunar segi meira en mörg orð þegar leggja á mat á arðsemisútreikninga manna þar á bæ.

 

Það er auðvelt að mæta 7% kostnaðarhækkun með því að spá bara upp á nýtt um þróun álverðs á þann hátt að taka verðið þegar það er í hæstu hæðum sögulega séð og framlengja út í það óendanlega!

Því er jafnframt haldið fram að nú sé í matinu tekið tillit til raunverulegs fjármagnskostnaðar við framkvæmdina. En þegar nánar er að gáð er miðað við líklegt álag gagnvart Landsvirkjun í heild, en ekki gagnvart Kárahnjúkavirkjun. Samkvæmt tölum frá 2006 skiptist raforkusala um það bil til helminga milli stóriðju og almenns markaðar og tekjur af sölu til almenns markaðar því verulega miklu stærri hluti af heildartekjum en tekjur af sölu til stóriðju. Sala til almenns markaðar ræður því mestu um vaxtaálag fyrirtækisins í heild. Þannig er ljóst að það er ósatt að tekið sé tillit til raunverulegs vaxtakostnaðar af verkefninu eins og Morgunblaðið heldur fram (22.1.). Lánsfjáráhætta þessa verkefnis að framkvæmdum loknum er einvörðungu sambærileg við lánsfjáráhættu í áliðnaðinum sem slíkum.

Það er greinilegt að menn teygja sig langt þegar orðið er ljóst að kostnaður við virkjunina er þegar orðinn verulega miklu hærri en núvirtar tekjur!

Kárahnjúkavirkjun arðsamari

Athugasemdir

[Þorsteinn Valur Baldvinsson, 21.1.2008 kl. 16:52]

Kannski ráð að bíða með alla útreikninga varðandi þessa framkvæmd, uns henni er lokið og allur kostnaður er komin fram.

Ufsaárstífla, Grjótaárgöng, Kelduárstífla ásamt nokkrum göngum, Hraunveitum og frágangi svæðisins er eftir, og ég hélt að nokkur hundruð miljónir eða miljarðar, skiptu máli í uppgjöri á svona verkefni.

[Árni Árnason (IP-tala skráð) 21.1.2008 kl. 17:05]

Við fáum sennilega aldrei að vita hversu neikvæð arðsemi Kárahnúkavirkjunar raunverulega er.

Það verður reynt með hundalógíkk og akróbatískum reiknikúnstum að sýna hagnað af þessu í það óendanlega. Hvaða forsendur eru til þess að álverð, sem greinilega er lækkandi á grafinu, taki stefnuna stanslaust upp ? 

 Hvar eru rannsóknarblaðamennirnir sem birta svona pollyönnu álverðsspár athugasemdalaust ? 

[Ólafur S. Andrésson (IP-tala skráð) 21.1.2008 kl. 21:40]

Rétt að rifja upp gamlar forsendur:

Heildarstofnverð 1200 miljónir USD  (þágengi tæplega 100 miljarðar kr, núgengi um 80 milljarðar kr).

Viðurkennt stofnverð í dag skv. vef LV (ýmislegt eftir):  133 milljarðar kr

Hver trúir áætlunum Landsvirkjunar?

[Þorsteinn Siglaugsson, 22.1.2008 kl. 09:06]

Ef ég man rétt átti um helmingur kostnaðar að vera í dollurum og helmingur í krónum. Samkvæmt því væri áætlaður kostnaður nú um 90 milljarðar. Kostnaður þá var uppgefinn án fjármagnskostnaðar á framkvæmdatímanum, en það skýrir umtalsverðan hluta af aukningunni.

Það vekur sérstaka athygli í þessu, að ólíkt því sem áður hefur verið gert byggir nú Landsvirkjun spá sína um þróun álverðs ekki á spám sérhæfðra ráðgjafarfyrirtækja heldur fær fyrirtækið Capacent til að leggja blessun sína yfir spána. Mér vitanlega hefur Capacent enga reynslu né þekkingu á álmarkaði og það vekur því nokkra furðu að fyrirtækið skuli yfirleitt taka að sér að gefa slíkt álit.