Stórfurðulegur rekstur

Allar forsendur og ákvarðanataka sem snýr að þessum Vaðlaheiðargöngum hefur yfir sér einhvern furðulegan ævintýrablæ, svona eins og aðstandendur og stjórnendur þessa mannvirkis sveimi um utan og ofan við náttúrulögmálin, og finnist það bara alveg sjálfsagt.

Skýringarnar á því að fólk velur hagkvæmari kostinn verða sífellt langsóttari. Sífellt fáránlegra verður að lesa um undrun aðstandendanna á að fólk skuli gera það. Furðuleg vinnubrögð við innheimtu gjalda hafa síðan leitt til mikillar aukavinnu fyrir bílaleigur, sem rukkað er fyrir, en forsvarsmönnum ganganna virðist þá helst hugkvæmast að kenna bílaleigunum um minni aðsókn en þeirra eigin ákvörðunum, sem eru rótin að gjaldtöku bílaleiganna.

Hver voru ráðningarskilyrðin þegar stjórnendur og blaðafulltrúar þessa fyrirtækis voru ráðnir? Eitthvað svona kannski: "Starfsmaðurinn skal vera afar óraunsær, með framúrskarandi litla ályktunarhæfni, en einkar fær í að beita rökleysum til að koma ábyrgð á eigin ákvörðunum yfir á aðra."

Leggja aukagjald á ógreiddar ferðir

Athugasemdir

[Sigurður I B Guðmundsson, 27.7.2019 kl. 11:40]

Íslensk stjórnsýsla í hnotskurn!

[Símon Pétur frá Hákoti (IP-tala skráð) 27.7.2019 kl. 12:11]

Hvað Vaðlaheiðarvafningavitleysuna varðar, er ég þér fullkomlega sammála Þorsteinn.

Algjört klúður frá upphafi til a.m.k. dagsins í dag.  Þverflokkalegt klúður, þar sem einkaframkvæmd var látin vera með ríkisábyrgð.

Og nú þetta með innheimtuaðferðina.

Jafnast helst á við veginn hans Steingríms að kolafabrikkunni á Bakka.  Af hverju borgum við fyrir þá sem nota hann?  En megum samt ekki nota.

Raðdómgreindarskortur og pilsfaldakapítalismi, sérgrein gjörspilltra og siðlausra þingmanna sem samþykktu dellumakaríið.