exbé - nýtt stjórnmálaafl

Miðað við auglýsingu í Mogganum í gær mætti ætla að nýtt stjórnmálaafl væri komið fram á sjónarsviðið - eitthvað sem kallar sig Exbé. Þrátt fyrir ítarlega leit fannst ekkert í auglýsingunni sem bendlaði þetta við neinn starfandi stjórnmálaflokk.

Hvað getur maður eiginlega sagt? Þótt sjálfstraust og lífsgleði skíni út úr hverju andliti á auglýsingunni verður tæpast sama sagt um stjórnmálaflokk sem er kominn í svo djúpan skít að hann þorir ekki einu sinni að segja hvað hann heitir þegar hann auglýsir.

Draumalandið

Hafliði Helgason skrifar athygliverðan leiðara í viðskiptablað Fréttablaðsins í gær um skyndibitahagvöxt, drifinn áfram af óarðbærum ríkisframkvæmdum. Áhrif frá Draumalandi Andra Snæs Magnasonar eru augljós.

Alveg merkileg bók reyndar, Draumalandið. Snarpari og frumlegri rökstuðning fyrir frjálshyggju er tæpast hægt að finna, en höfundurinn nálgast málið á allt öðrum forsendum en hagfræðingarnir og heimspekingarnir sem hafa mest látið að sér kveða í þeirri umræðu. Í staðinn fyrir að tala um hagkvæmni og arðsemi einkaframtaksins eða rétt manna til frelsis talar hann einfaldlega um hugmyndir og drifkraft þeirra. Hann ætti eiginlega að fá heiðursverðlaun Frjálshyggjufélagsins ef þau eru til!

Nú geta endurnar tekið bensín í Vatnsmýrinni

Sé að nú hefur R-listinn samþykkt bensínstöð í miðri Vatnsmýrinni. Sjálfstæðismenn benda á að engin þörf sé fyrir hana. Auðvitað er gagnrýninni ekki svarað með rökum, heldur einhverju þvaðri um að einhvern tíma hafi Sjálfstæðismenn sjálfir verið samþykkir bensínstöð einhvers staðar. Þetta heitir víst samræðustjórnmál.

Maður hélt að menn lærðu af mistökunum og myndu kannski staldra við í stað þess að halda áfram að festa Hringbrautarvitleysuna enn frekar í sessi. En það eru víst ekki samræðustjórnmál.

RÚV enn og aftur

Fylgdist áðan með Sigurði Kára og Ögmundi rífast um rekstrarform RÚV, sem er víst heitasta málið núna að vatnalögunum gengnum. Gaman að sjá menn takast á án þess að æsa sig úr hófi fram. Ögmundur er líka kurteis maður og lét vera að vaða í Sigurð Kára eins og rumurinn úr Frjálslynda flokknum gerði víst um daginn.

Annars er þetta merkileg umræða. Alltaf þegar á að hreyfa við RÚV verður allt vitlaust. Og því miður er málflutningur þeirra sem vilja stokka upp alltaf eitthvað hálf lamaður. Auðvitað verður ríkisstofnun ekkert "nútímalegri" þótt henni sé breytt í hlutafélag. Hlutafélagaformið var fundið upp fyrir löngu síðan til að gera einstaklingum kleift að stofna fyrirtæki án þess að hætta öllum eigum sínum. Ríkið þarf í raun ekkert á þessu formi að halda fyrir sinn rekstur. Mergurinn málsins er auðvitað sá, að það gengur ekki að starfsmenn taki alltaf stofnunina í gíslingu þegar á að gera einhverjar breytingar. Eini tilgangurinn með því að breyta RÚV í hlutafélag hlýtur að vera sá, að hamla gegn þessu. Af hverju í ósköpunum segja menn það ekki bara hreint út?

Gagnrýni frá hægri

Það er ómetanlegt að fá svona vettvang til að láta ljós sitt skína.

Ætli þessi síða verði ekki mestan part vettvangur fyrir gagnrýni frá hægri á menn og málefni. Það er af nógu að taka. Einhver stríðni gæti svo slæðst með.

Svo verður bara að koma í ljós hvort einhver sér ljósið!

Mjókkun Reykjanesbrautar

Það er alltaf gaman þegar menn fá góðar hugmyndir. Dagur B. Eggertsson, vonarstjarna Samfylkingarinnar hér í borginni fékk til dæmis svoleiðis um daginn. Eftir að hafa lengi vel talað um frekar fátt í kosningabaráttunni varpaði hann fram hugmynd. Hún var sú að leggja einbreiða Sundabraut. Manni skildist að Degi fyndist nóg komið af hraðbrautum. Nú skyldi leggja borgargötur. Það er gaman að Dagur skuli hafa uppgötvað hugtakið borgargata. Hins vegar er leiðinlegt að hann skuli ekki hafa verið búinn að því þegar hann lét leggja áttbreiða Hringbraut inni í miðjum bæ. Maður veltir því fyrir sér hvort borgargötur með iðandi mannlífi eigi þá að vera úti í sveit, en hraðbrautirnar í miðbænum. Svo er gaman að spá í hvað komi næst, því menn fljóta varla á bara einni hugmynd í gegnum heila kosningabaráttu. Áttbreið Grettisgata kannski? Mjókkun Reykjanesbrautar?