Hvers vegna tré?

Hvers vegna ekki að ganga lengra og hafa þróaðri lífverur í þessum hylkjum?

(Þær eyða þá kannski ekki neinum pening heldur meðan þær eru þar)

„Í hvaða heimi lifir Hjálmar Sveinsson?“

Mótsagnakennt - en hún er ekki ein um það

Biskup segist styðja það að konur taki sjálfar ákvörðun um fóstureyðingu.

Jafnframt segir biskup að fóstur kunni að hafa rétt til lífs.

En þarna verður ekki bæði sleppt og haldið:

Sé rétturinn til lífs til staðar, þá er fóstureyðingin alveg sambærileg við manndráp. En telur biskup að það eigi að vera hverjum og einum í sjálfsvald sett að drepa fólk? Ég efast um það.

Sé rétturinn til lífs hins vegar ekki til staðar er auðvitað engin ástæða til að setja neinar takmarkanir.

Biskup segir að lokum að breytingarnar sem lagðar eru til í frumvarpinu séu til þess fallnar að vekja upp grundvallarspurningar í huga fólks. Henni virðist þykja það neikvætt að fólk velti fyrir sér grundvallarspurningum. Hún vill fremur að þær gleymist. Það finnst mér mjög athyglivert.

 

Biskup gagnrýnir frumvarp um þungunarrof

Ríkharður þriðji

Ég hafði nú einmitt ætlað mér að skrifa hér um frábæra uppsetningu Borgarleikhússins á Ríkharði þriðja sem ég sá á generalprufu í lok desember.

Nú hefur Björn Bjarnason skrifað um sýninguna á bloggi sínu og segir meðal annars:

"Í verkum sínum fjallar Shakespeare (1564 -1616) um efni sinnar tíðar á þann hátt að það textinn er hafinn yfir stað og tíma. Oft er uppsetning og texti verkanna á þann veg að þau verða þung og fjarlæg. Ekkert slíkt háir þessari sýningu. Leikin er ný þýðing. Kristjáns Þórðar Hrafnssonar. Hún á ríkan þátt í tengslunum sem skapast milli áhorfanda og grimma höfuðpaursins. Með fagurgala tekst honum að fá áhorfendur á sitt band eins og fórnarlömb sín á sviðinu."

Hér hittir Björn naglann á höfuðið. Fyrir utan frábæran leik, sérstaklega stórkostlega frammistöðu Hjartar Jóhanns Jónssonar í aðalhlutverkinu, vakti sérstaka athygli mína hve snilldarleg þýðing Kristjáns Hrafnssonar var. Það er ekki auðvelt að þýða Shakespeare, en hér tókst Kristjáni að koma frumtextanum frábærlega til skila á einstaklega áreynslulausu og eðlilegu máli, þótt bundið sé. Það er meira en að segja það.

Fjármálaeftirlit verður að rannsaka

Það að viðskiptasaga skuli glatast þegar reikningi er lokað er verulegt áhyggjuefni. Ef þannig er merkir það að ekki er hægt að treysta þeim kerfum sem bankinn notar til að halda utan um upplýsingar um inneignir og skuldir viðskiptavina sinna. Fjármálaeftirlitið hlýtur að grípa inn í og rannsaka þetta mál tafarlaust, sé það starfi sínu vaxið.

Reikningur barns tæmdur vegna mistaka

Seðlabanki sýnir úrkynjaða list

Það er vel við hæfi á þessum tímum að Seðlabankinn standi fyrir sýningu á því sem yfirmenn hans hafa nú skilgreint sem úrkynjaða list. Þeir komast þá á stall með Hriflu-Jónasi og fyrirmyndum hans erlendis, sem settu upp slíkar sýningar undir miðbik síðustu aldar.

Verða sýndar á Safnanótt

Ekki bara talibanar í Afganistan

Heimsbyggðin saup hveljur þegar talibanar í Afganistan eyðilögðu fornar Búddastyttur með dýnamíti.

Snillingurinn sem stjórnar Seðlabankanum hefur að vísu ekki enn, að því vitað sé, beitt sprengiefni á listasafnið sem þessi einkennilega stofnun hefur af einhverjum undarlegum ástæðum safnað upp. En það er ekki endilega mikill munur á að eyðileggja verk og hinu að læsa þau niðri í kjallara um ókomna tíð.

Það eru talibanar í Seðlabankanum ekki síður en í Afganistan. Og menningarástandið greinilega ekki skárra en nýleg dæmi sýna að siðferðisstigið er.

Listasafn Íslands þarf að sækja öll þessi verk hið snarasta úr Seðlabankanum. Þeim menningarsnauða skríl sem þar ræður greinilega ríkjum er ekki treystandi til að hafa umsjón með þeim.

„Undarleg tímaskekkja puritanisma“

Sannar bara hið fornkveðna ...

... að vinstrimenn eru upp til hópa letingjar og liðleskjur

... þeir sem eru hallir undir ESB eru of timbraðir af rauðvínssötri til að komast á lappir á morgnana

... fátæklingar eru latari en þeir efnameiri

... Miðflokksmenn eru duglegir að fara fram úr (þótt við vitum að þeir vaka stundum líka lengi frameftir).

 

Annars fannst mér reyndar athygliverðasta niðurstaðan sú, að einhleypir skuli vera andvígari því að seinka klukkunni en þeir sem ekki eiga maka. Þetta hlýtur þá eiginlega að eiga við um þá sem eru einhleypir en eiga samt maka, en þeir sem ekki eiga maka eru latir á morgnana, sama hvort þeir eru einhleypir eða ekki (sjá skjáskot af vef könnunarfyrirtækisins):

Mikill meirihluti vill seinkun klukku

Snillingur!

Hvað sem öðru líður er eitt ljóst: Þeir sem eru nógu skyni skroppnir til að borga sig dýrum dómum inn á fyrirlestur í Hörpu til að hlusta á svona þvælu eiga svo sannarlega skilið að tapa peningunum sem í það fara. Hvort sem þeir sleikja þá eða ekki.

Og ég tek ofan fyrir manneskju sem tekst að plata fólk til að borga henni fyrir svona þvaður. Hún er einfaldlega snillingur!

Kyssirðu peningana þína?

Mikil framför

Það er mjög mikil framför fólgin í því að taka upp sjálfsafgreiðslu í verslunum. Eitt megineinkennið í þessum rekstri er hversu flæði viðskiptavina gegnum verslunina getur verið sveiflukennt. Það gerir að verkum að mönnunin er sífelldur höfuðverkur, sem veldur því oft að langar biðraðir myndast með tilheyrandi óhagræði fyrir viðskiptavini. Með sjálfsafgreiðslunni stórlagast þetta. Þess verður ekki langt að bíða að biðraðir við mannaða afgreiðslukassa heyri sögunni til.

Sjálfsafgreiðsla vekur spurningar

Óánægðir með að hætt er að bera sólskinið inn

Þeir Gísli, Eiríkur og Helgi á Bakka hafa lýst megnri óánægju með að ríkisvaldið skuli nú hafa brugðist hlutverki sínu og hætt að bera sólskinið inn á bæinn í húfum líkt og samið var um eftir að þeir bræður þreyttust á þeirri iðju og þurftu að fara á örorkubætur vegna kulnunar í starfi. Nú er víst bara myrkur á Bakka, enda bæjarhúsin gluggalaus eins og alkunna er.

Gagnrýna að ekki sé dýpkað yfir hávetur