Fyrirtæki þurfa að vakna og leysa þetta mál

Það er fjöldi starfa sem fólk með Downs-heilkenni getur sinnt vel engu síður en aðrir. Það getur auk þess verið mjög jákvætt fyrir starfsanda að fá slíka einstaklinga inn í hópinn enda leitun að jákvæðara og skemmtilegra fólki.

Það er algerlega ótækt að þetta fólk sitji aðgerðalaust, hvað þá eftir að hafa lokið krefjandi námi og sýnt þannig og sannað getu sína til að taka þátt í samfélaginu.

Það eina sem vantar upp á er að fyrirtæki taki við sér, hafi samband við Þroskahjálp með ábendingu um laus störf. 

Um leið og fyrsta fyrirtækið hefur gengið í málið, ráðið fyrsta starfsmanninn og passað upp á að frétt af málinu birtist í fjölmiðlum, munu fleiri fylgja í kjölfarið.

Spurningin er því bara þessi: Hver ætlar að verða fyrstur?

Finnur ekki eldinn inni í sér

Menningarhlutverk Ríkissjónvarpsins

Í gærkvöldi sýndi Ríkissjónvarpið mynd Kristínar Jóhannesdóttur "Svo á jörðu sem á himni". Þessi mynd er eitt af fáum raunverulegum stórvirkjum íslenskra leikstjóra, gott ef ekki það eina.

Stór hluti myndarinnar er á frönsku. Góð textun er því lykilatriði enda ekki hægt að reikna með að nema brot af áhorfendum hér séu altalandi á þá tungu.

En textann vantaði. Bersýnilega hafa menningarpostular stofnunarinnar ekki betri þekkingu á íslenskri kvikmyndagerð en svo að þeir hafa ekki vitað að þörf væri á að texta myndina. Og metnaðurinn ekki meiri en svo að engum hugkvæmdist að bæta úr þegar þetta kom á daginn. Virðingarleysið gagnvart áhorfendum og aðstandendum þessarar stórkostlegu kvikmyndar algert.

Menningarhlutverk?

Er ekki kominn tími til að stafla mannauðnum hjá þessari sorglegu stofnun út á stétt, læsa á eftir honum og henda lyklinum?

Afhenda svo lóðina Holu-Hjálmari og verktakavinum hans til að byggja þar enn eina lúxusblokkina fyrir heimilislausa erlenda auðmenn?

Og nota síðan þá sex milljarða sem sviðnir eru út úr skattgreiðendum til að niðurgreiða þessa hlægilegu starfsemi í eitthvað gagnlegra?

Markmiðið er ekki að tryggja góð lífskjör

Markmið hávaðaseggjanna í verkalýðshreyfingunni er alls ekki að tryggja umbjóðendum sínum góð lífskjör.

Markmiðið er þríþætti:

1. Að rýra lífskjör þeirra sem hafa það betra en þeir sjálfir, til að fullnægja eigin öfund.

2. Að eiga í kjarabaráttu, þ.e. setja fram hótanir og efna til verkfalla, ekki vegna þess að það bæti lífskjör, heldur vegna þess að þeir hafa bitið í sig að hlutverk verkalýðsfélaga sé kjarabarátta, ekki bætt lífskjör.

3. Og þetta er mikilvægast: Að vekja athygli á sjálfum sér og njóta athyglinnar.

Horfi í fleira en krónur við kjarasamningagerð

Íslendingar mega ekki hagnast

Vandinn liggur í því að ráðuneytið eða ráðherrann lætur sér í léttu rúmi liggja þótt útlendingar hagnist á því að veita heilbrigðisþjónustu, en séu líkur til að samlandar þeirra hagnist á því verður að hindra það með öllum ráðum.

Þótt það kosti ríkið meiri útgjöld og kosti sjúklinga jafnvel heilsuna eru það smámunir samanborið við ávinninginn af því að koma í veg fyrir að íslenskir læknar hagnist á starfi sínu.

Dýrasta lausnin

Hvergerðingar afvelta af ísáti

Tvö þúsund tonn af ís í tíu þúsund Hvergerðinga er vel í lagt.

Hver bæjarbúi, smábörn og gamalmenni þar meðtalin, hefur þá innbyrt um tvö hundruð kíló af ís. Geri aðrir betur!

Nú má því búast við að bæjarbúar verði allverulega afvelta, og muni minna helst á  steypireyðir með alvarlegar meltingartruflanir næstu áratugina.

Líklega verður tæpast hægt að aka framhjá þorpinu út af prumpufýlu um ókomna tíð og verður nú Vegagerðin snarlega að drífa í að tvöfalda Þrengslaveginn ef ekki á illa að fara.

 

Gáfu tvö tonn af ís

Tungulipur greppitrýni í borgarstjórn

Sumt fólk hefur gaman af að hræða börn með því að gretta sig framan í þau eins og Grýla eða Leppalúði. Og hægrimenn í borgarstjórninni eru vitanlega líkir börnum í sakleysi sínu og hreinlyndi, og vita að aðeins þannig komast þeir í himnarann, að þeir verði eins og börn. Það er því ekki nema von að þeir verði smeykir þegar greppitrýnin taka að reka framan í þá klofnar eiturtungurnar með grettum og geiflum eins og pokurinn í aldingarðinum forðum og reyna að fá þá til að bíta í súru eplin.

Ullað í borgarráði Reykjavíkur

Trump leikur sér að fjölmiðlunum

Trump kann svo sannarlega að leika sér að fjölmiðlum, enda hafa fáir meiri reynslu í slíku en hann - raunveruleikasjónvarpsstjarnan sjálf.

Þetta uppátæki mun eflaust, í huga stuðningsmanna hans, staðfesta endanlega kenningu hans um að fjölmiðlar séu á móti honum.

Ef Trump drykki áfengi væri hann örugglega búinn að opna kampavínsflösku núna!

Yfir hundrað leiðarar gegn Trump

Þarf að greina orsakirnar

Ef verðlag á bókum er ekki orsök samdráttar í bóksölu er vandséð að verðlækkun breyti miklu. Eflaust myndi hún hafa einhver smávægileg áhrif, en ekkert sem máli skiptir.

Bókaútgefendur þurfa að byrja á að fara í alvöru greiningu á ástæðum þess að bóksala hefur dregist saman. Þeir þurfa einnig að reyna að átta sig á hvernig líklegt er að þróunin verði næstu ár. Þegar þessari greiningu er lokið er fyrst hægt að fara að velta fyrir sér viðbrögðum og aðgerðum. En lykillinn er að skilja þróunina og orsakir hennar.

Bóksala dregst enn saman