Hvar liggja mörkin?

Steinunn Valdís segir af sér vegna þess að hún þáði styrki frá fyrirtækjum þegar góðærið var í algleymingi. Þar var hún í stórum hópi, en hefur nú verið þvinguð til að víkja, fyrst og fremst fyrir tilstilli eigin flokksmanna.

Margir álíta að styrkir fyrirtækja til stjórnmálamanna séu ávallt mútur. Það held ég að sé fjarri lagi. Á þeim tíma sem þessir styrkir voru veittir áttu bankarnir ekki undir högg að sækja og þurftu síður en svo á neinum mútugreiðslum að halda. Þeir nutu þvert á móti mikils velvilja í samfélaginu og þeir fáu sem efuðust um stöðu þeirra áttu fótum fjör að launa.

Fyrirtæki, sérstaklega fyrirtæki sem njóta velgengni, hafa um langa hríð styrkt stjórnmálamenn. Í einhverjum tilfellum vafalaust til að reyna að kaupa sér greiða, en yfirleitt einfaldlega vegna þess að stjórnendurnir hafa litið á slíkt sem samfélagslega skyldu og gjarna einnig átt erfitt með að hafna betlinu.

Ef átta milljónir til Steinunnar eru ástæða afsagnar, hvað þá um fimm milljónir til Dags? Og hvað þá með alla hina sem einhverja styrki hafa þegið? Eiga allir stjórnmálamenn sem hefur tekist að væla út pening frá fyrirtækjum að segja af sér? Hversu langt ætlar taugaveiklunin að leiða okkur?

Er ekki mál að linni?

Steinunn Valdís segir af sér

Athugasemdir

[Sigurður Haraldsson, 28.5.2010 kl. 00:27]

Nei Þorsteinn það er mál að fólk taki ábyrgð á gjörðum sínu og verkum!

                                         Byltingin lyfi!

[Magnús Óskar Ingvarsson, 29.5.2010 kl. 11:10]

Það er ekki mál að linni. Þessa siðlausu einstaklinga þarf að hreinsa út af þingi og úr valdastöðum. Guðlaugur Þór, Össur, Árni Þór (er það ekki annars?) og allir hinir sem hafa makað krókinn ótæpilega. Það er bara ein ástæða þess að stjórnmálamenn vilja ekki undir neinum kringumstæðum segja frá styrkjum og öðrum greiðslum sem til þeirra hafa runnið. Hún er sú, að þeim er sjálfum ljóst að þetta er siðleysi og verður hart dæmt af samfélaginu. Og þannig á það að vera. Siðleysi stjórnmálamanna, sem alla tíð hefur viðgengist hér á landi, ber að fordæma. Það verður að hreinsa það út sem lið í viðleitni til að endurreisa traust á stjórnmálamönnum. Það er nú um stundir mælt á núlli. Nýir stjórnmálamenn verða að átta sig á því að þeir eiga eftir að vinna sér inn traustið. Hinir eldri verða að átta sig á því að þeir glutruðu því niður sjálfir.

[Þorsteinn Siglaugsson, 7.6.2010 kl. 12:02]

Það er ekki samasemmerki milli siðleysis og þess að þiggja styrki í prófkjörsbaráttu.

[Þorsteinn Siglaugsson, 7.6.2010 kl. 12:03]

... en það er hins vegar siðleysi að ráðast gegn félaga sínum með lýðskrumi til að reyna að kaupa handa sjálfum sér nægilega mörg atkvæði til að skríða í nýja djobbið í borgarstjórn.